خواب میں تاجر دیکھنے کی تعبیر

Khwab me tajir dekhne ki tabeer

(۱) خواب میں تاجر کو دیکھنا یا خود کو تاجر بنتا دیکھنا اور تجارت کا کام کرنا جھوٹی قسم کھانے، نماز چھوڑنے، ناپ تول میں کمی کرنے، سود کھانے اور ناپاک ہونے کی دلیل ہے۔

(۲) جَو (Barley) بیچنے والے شخص کی تعبیر دنیا کو پسند کرنے والے اور آخرت کو بھولنے والے شخص سے کی جاتی ہے۔ خواب میں کوئی چیز بیچ کر پیسے قیمت کے طور پر وصول کرنے میں کوئی حرج نہیں ہے۔

(۳) کات (دھاگہ) بیچنا سفر کی علامت ہے اور نمک کی تجارت کرنے والا مالدار آدمی کی علامت ہے۔

(۴) قیمتی کپڑا فروش کی تعبیر امانتدار، عزت اور مرتبہ والے شخص سے کی جاتی ہے، جب تک بیچنے والا شخص قیمت وصول نہ کرلے۔ اور اگر قیمت وصول کرے تو اس کی تعبیر مختلف ہو گی۔

(۵) پھل فروش کی تعبیر محنت سے رزق حاصل کرنے والا اور آخرت کو دنیا پر ترجیح دینے والا شخص ہے۔

(۶) ریاحین یا ریحان (basil) فروخت کرنے والے کی دلالت غم اور دُکھی شخص پر ہوتی ہے، یا ایسے قرآن پڑھنے والے پر دلالت ہے جو قرآن پڑھ کر لوگوں کو رُلا دے۔

(۷) پرنده بیچنے والے کی تعبیر باندی بیچنے والا ہے۔

(۸) پیتل بیچنے والے کی تعبیر کمزور آدمی سے کی جاتی ہے۔

(۹) کسی نے خواب دیکھا کہ وہ کسی دکان پر بیٹھا ہے اور اس کے آس پاس سامانِ تجارت رکھا ہوا ہے خود تجار کے لباس میں ہے اور کسی کو حکم دے رہا ہے اور کسی کو روک رہا ہے تو دلیل ہے کہ صاحبِ خواب تجارت میں ریاست کرے گا۔

(۱۰) اگر صاحبِ خواب کوئی تاجر نہ ہو اور خواب میں اپنے ہاتھ میں آلہ تجارت مثلاً ترازو پیمانہ وغیرہ دیکھے تو دلیل ہے کہ وہ فقر سے محفوظ ہوگا۔

(۱۱) خواب میں تاجروں کو دیکھنا منافع وفوائد ،مناصبِ عالیہ، اسفار اور عجیب باتوں سے مطلع ہونے پر دلالت کرتا ہے۔

(۱۲) کبھی رؤیتِ تجارت فرائض مثلاً حج، روزہ، جہاد، نمازِ جمعہ وغیرہ میں بہت زیادہ کو تا ہی کرنے پر دلالت کرتی ہے۔

(۱۳) کسی نے خواب دیکھا کسی دکان پر بطور دکان دار عورت بیٹھی ہے یا دیکھا کہ عورتیں دکانوں پر دکانداری کر رہی ہیں تو اس کی تعبیر بازاروں کے لحاظ سے ہو گی مثلاً اگر بازار اسلحہ کا ہے اور دکانیں اسلحہ کی ہیں تو دشمن کی حرکت کی طرف اور بلاد مسلمین پر قبضہ کرنے طرف اشارہ ہے اگر بازار کپڑوں کا ہے اور دکانیں کپڑوں کی ہیں تو یہ منافع کثیرہ کی دلیل ہے۔

(۱۴) خواب میں گھاس بیچنے والے کو دیکھنا کثرتِ سفر پر دلالت کرتی ہے اور اس کی تعبیر درزی سے بھی کی جاتی ہے۔

(۱۵) خواب میں کھجور بیچنے والے کی تعبیر حلال کمائی پر دلالت کرتی ہے۔  کبھی اس کی تعبیر علمِ حدیث سے بھی ہوتی ہے۔

(۱۶) خواب میں مٹی اٹھانے والے کو دیکھنا غم اور تکلیف پر دلالت کرتا ہے۔  خودمٹی اٹھا کر اور دوسری جگہ منتقل کرتے دیکھنا ساتھیوں سے غم وتکلیف کے دور ہونے کی دلیل ہے۔