Khwab ki tabeer ka matlab hai khwab mein dikhne wali cheezon ka asal paigham samajhna. tabeer batana koi andaza lagane ka kaam nahi hai. Ibn Sirin, jo Basra ke ek baray aalim thay, ne apni kitab Ta’bir al Ru’ya mein iske liye baqaida usool likhe hain. Aaj bhi zyada tar tabeer isi kitab aur Imam Jafar al Sadiq, Hazrat Danial aur doosre mo’tabar ulema ke qaul par mabni hoti hai. Neeche apna khwab huroof ke hisaab se talash karein.
Khwab Kitne Qisam Ke Hotay Hain
Sahih Bukhari ki Kitab al Ta’bir mein khwabon ke teen darje bataye gaye hain.
- Pehla darja sachay khwab hain, jinhe Ru’ya Saliha kaha jata hai. Yeh Allah ki taraf se hotay hain aur kabhi kabhi kisi aane wali baat ki taraf ishara bhi karte hain.
- Doosra darja Shaytani khwab hain, jo dara dene wale ya pareshan karne wale hotay hain.
- Teesra darja Nafsani khwab hain, yani wo jo hamare apne din bhar ke khayalat aur fikr ka natija hotay hain, jinka koi khaas matlab nahi hota.
Yeh farq samajhna zaroori hai kyunke har khwab ki tashreeh nikalna theek nahi. Agar khwab pareshan karne wala tha ya bila kisi wajah ke dara dene wala tha, to zyada mumkin hai woh Shaytani ya Nafsani qisam ka ho, na ke koi paigham.
TabeerKhwab website ki tabeer kahan se li jati he?
Is site ki tabeer classical kutub se li jati hai, andazon se nahi. Har entry likhte waqt hum Ibn Sirin ki Ta’bir al Ru’ya, Imam Jafar al Sadiq ke aqwal, aur Hazrat Danial (AS) se mansoob riwayat, aur Abdul Ghani Nabulsi ki kitab ko dekhte hain. Jahan mumkin ho wahan hum yeh bhi likhte hain ke kaunsi tabeer kis aalim se li gayi hai, taake aap khud tasdeeq kar sakein.
Yeh baat bhi samajh lein ke tabeer ek ilm hai, ilm e ghaib nahi. Kisi bhi tashreeh ko parhne ke baad agar koi bara faisla lena ho, to Quran, Sunnat, istikhara aur ahle ilm se mashware ko hamesha pehle rakhein.
Alamat Ke Hisaab Se khawab ki tabeer Talash Karein
Poora khuwabnama ek hi safhe par parhna mushkil hota hai. Isi liye ap ne khuwab mein jo alamat dekhi thi wo yahan type kr ke apni tabeer dekh sakte hein.
خواب میں علامات اہم ہوتی ہیں۔ جیسے کبوتر، دریا، کوئی انسان، کوئی جانور وغیرہ۔
صرف وہ علامت یہاں لکھیں۔ اور سرچ پر کلک کریں۔
Apni Khwab ki Tabeer Kaise Maloom Karein
Sahi tabeer nikalne ke liye sirf ek lafz ka matlab jaanna kaafi nahi hota. Ibn Sirin khud likhte hain ke khwab dekhne wale ke halaat, uska pesha, uski niyat aur khwab ka waqt bhi tabeer par asar dalta hai.
Teen cheezein zaroor dekhein.
Pehli, khwab mein aap kya kar rahay thay, sirf kya dikha yeh mat dekhein. Saanp ko dekhna aur saanp se larna, dono ki tabeer alag hai.
Doosri, rang aur halat. Ek hi cheez ka mukhtalif rang ya halat mukhtalif tabeer deta hai, jaisay safed saanp aur kaala saanp.
Teesri, khud khwab dekhne wala. Aik hi khwab kisi mard ke liye aur kisi aurat ke liye, ya kisi bemar shaks ke liye alag tabeer rakh sakta hai.
Isi liye har mozu ke safhe par hum ek se zyada surat ki tabeer dete hain, taake aap apne khwab se sabse qareeb wali surat chun sakein.
Zaroori Baat
Yeh site tabeer classical ilm ke hawale se pesh karti hai, magar yeh koi qati ya yaqini faisla nahi hai. Ghaib ka ilm sirf Allah Ta’ala ke paas hai. Zindagi ke aham faislay hamesha Quran, Sunnat, istikhara aur ahle ilm ke mashware ki bunyad par karne chahiye.
Umumi Sawalat
tabeer kaise maloom ki jati hai?
Sabse pehle khwab ka mozu pehchana jata hai, phir us mein maujood alamaton jaise rang, halat aur amal ko dekha jata hai. Iske baad Ibn Sirin aur doosre mo’tabar ulama ki kutub se milta julta waqia dhoonda jata hai. Aakhir mein khwab dekhne wale ke apne halaat ko madde nazar rakha jata hai.
Kya har khwab ki koi tabeer hoti hai?
Nahi. Sahih Bukhari ke mutabiq khwab teen qisam ke hotay hain, Allah ki taraf se sachay khwab, insan ke apne khayalat ka aks, aur Shaytan ki taraf se pareshan karne wale khwab. Sirf pehli qisam ki tabeer nikalna faida mand hoti hai.
Bura khwab dekhne ke baad kya karna chahiye?
Nabi Kareem (SAW) ne sikhaya ke bura khwab dekhne ke baad Allah ki panah maangein, apni baayein taraf teen martaba halki phoonk marein, karwat badal lein aur us khwab ko kisi se bayan na karein. Is se us khwab ka nuqsan nahi hota, In Sha Allah.
Kya khwab se mustaqbil ka pata chal sakta hai?
Kabhi kabhi sachay khwab ki tabeer kisi aane wali baat ki taraf ishara karte hain, magar yeh kam hote hain aur inpar zindagi ke bare faisle nahi karne chahiye. Ghaib ka ilm sirf Allah Ta’ala ke paas hai.