Khwab men Hazrat Ibraheem AS ko Dekhne ki Tabeer

(1) خواب میں حضرت ابراہیم علیہ السلام کا دیدار خیر و برکت، عبادت و بزرگی، رزق، ایثار، مقامات مقدسہ کی تعمیر کا اہتمام، اولا د صالح، امر بالمعروف ونہی عن المنکر ، علم، ہدایت اور اللہ تعالیٰ کی اطاعت میں رشتہ داروں اور اہل وعیال کو چھوڑنے پردلالت کرتا ہے۔ اسی طرح ابراہیم علیہ السلام کو خواب میں دیکھنا والد شفیق ہونے پر دلالت کرتا ہے اس لئے کہ وہ ابوالاسلام ہیں، انہوں نے ہمیں مسلم کے نام سے موسوم کیا ۔

(۲) بعض مرتبہ ابراہیم علیہ السلام کی رؤیت سختیوں میں مبتلا ہونے کے بعداس سے نجات ملنے پر دلالت کرتی ہے ۔

(۳) بعض مرتبہ ابراہیم علیہ السلام کو دیکھنا رشتہ داروں کے درمیان اصلاح کا مشکل ہونا یا خیر کے توقع رکھنے والے کے لئے خیر کے مشکل ہونے پر دلالت کرتا ہے ۔ اگر خواب دیکھنے والا نجوم کا علم رکھتا ہو یا تعبیر الرویا کا عالم ہو تو اس کی تعبیر اور پیشنگوئی میں خلل و غلطی کا وقوع ہوگا ۔

(۴) بعض مرتبہ ابراہیم علیہ السلام کی خواب میں رؤیت نیکی کی طرف رہنمائی، نیکی پر ہمیشگی اور حفاظت اور برا چاہنے والے بھائیوں سے دوری پر دلالت کرتی ہے۔

(۵) کسی وقت ابراہیم علیہ السلام کو اس حال میں دیکھنا کہ وہ خواب دیکھنے والے کو چھو رہے ہیں تو یہ محبت الہی کی دلیل ہے۔ اگر کسی کے اعضاء میں سے کسی عضو میں تکلیف ہو اور وہ خواب میں حضرت ابراہیم علیہ السلام کو اسے ہاتھ لگاتے ہوئے دیکھے تو اس کی شفاء اور اللہ تعالی کی طرف سے عافیت کی دلیل ہے۔

(۶) اس طرح ابراہیم علیہ السلام کو دیکھنا حج بیت اللہ نصیب ہونے پر بھی دلالت کرتا ہے ۔

(۷) اگر کوئی عورت خواب میں حضرت ابراہیم علیہ السلام کو دیکھے تو اس کی تعبیر یہ ہے کہ اس کی اولاد کی وجہ سے اس کا شوہر اسے تکلیف پہنچائے گا یا اس کی بعض اولاد تکلیف میں مبتلا ہو گی اور پھر اسے نجات مل جائے گی ۔

(۸) ابراہیم علیہ السلام کو دیکھنے کی تعبیر یہ ہے کہ صاحب خواب کے بیٹوں میں سے کوئی ایک اپنی بیوی کو طلاق دے گا۔

(۹)اگر کسی نے دیکھا کہ گویا وہ ابراہیم علیہ السلام بن یا ان کا مصاحب ہوا تو دلیل ہے کہ دشمنوں کی طرف سے تکلیف پہنچے گی اور پھر دشمنوں کے مقابلے میں کامیابی ہوگی اور اس کی مدد کی جائے گی۔

(۱۰) کبھی کبھی ابراہیم علیہ السلام کے خواب میں دیدار کی تعبیر ولایتِ امام، عادل ہونے یا اس قسم کے لوگوں کی ہمنشینی سے کی جاتی ہے اور بعض مرتبہ بڑوں کی طرف سے کوئی خوشخبری پہنچانے والے سے تعبیر کی جاتی ہے۔

(11) کس نے ابراہیم علیہ اسلام کو دیکھا تو تعبیر ہے کہ صاحب خواب اپنے دشمنوں کے مقابلے میں کامیاب ہوگا، کبھی اس کی دلالت امامت و حکومت پر فائز ہوکر عدل و انصاف کرنے پر ہوتی ہے یا پھر تعبیر یہ ہوتی ہے کہ اس صفت سے متصف شخص کا مصاحب ہوگا یا اس کو نا امیدی کے بعد رزق عطا کیا جائے گا۔ کبھی بڑوں کی طرف سے پیغام رساں آنے کی علامت سمجھی جاتی ہے۔ یا دلیل ہے کہ زوجۂ مؤمنہ نصیب ہوگی اور حکومتِ وقت سے تکلیف پہنچے گی لیکن اس سے جلد نجات ملے گی۔

(۱۲) اگر کسی نے دیکھا کہ گویا ابراہیم علیہ السلام اس کو اپنی طرف بلا رہے ہیں اور وہ اس کا جواب تلبیہ (لبیک اللہم لبیک) کی صورت میں دے کر تیزی سے ان کی طرف جا رہا ہے تو تعبیر یہ ہے صاحب خواب کا مرتبہ بلند ہوگا ۔

(۱۳) اگر کسی نے دیکھا کہ ابراہیم علیہ السلام اسے آواز دے رہے ہیں اور یہ اس کا جواب نہیں دے رہا۔ یا دیکھا کہ ابراہیم علیہ السلام اسے ڈانٹ رہے ہیں اور دھمکا رہے ہیں یا ابراہیم علیہ السلام کو دیکھا کہ وہ ناراض ہیں تو اس کی تعبیر یہ ہے کہ حج کی طاقت رکھتے ہوئے بھی حج نہیں کر سکے گا یا نماز چھوڑ دیگا یا امام کو برا بھلا کہے گا یا منافق ہو جائے گا ۔

(۱۴) اگر کسی کافر نے ابراہیم علیہ السلام کی خواب میں زیارت کی تو یہ اس کے مسلمان ہونے کی دلیل ہے۔ اگر گناہ گار زیارت کرے تو گنا ہوں سے تائب ہوگا اور نماز نہ پڑھنے والا ان کی زیارت کرے تو دلیل ہے کہ وہ نمازوں کی پابندی کرے گا۔

(۱۵) اگر کسی کی صورت ابراہیم علیہ السلام کی صورت کی طرح ہوگئی یا ان کے لباس کو زیب تن کیا تو تعبیر یہ ہے کہ اس کو کسی مصیبت و بلا سے سابقہ پڑے گا ۔

(۱۶) بعض دفعہ ابراہیم علیہ السلام کی رؤیت غم، وہم دور ہونے، خیر نصیب ہونے، وسعتِ دنیاوی، اور ہدایت یافتہ ہونے کی دلیل ہے۔

(۱۷) بعض علماء تعبیر نے کہا ہے کہ ابراہیم علیہ السلام کو دیکھنا (گناہ گار ) والد کی نافرمانی کی علامت ہوتی ہے۔

(۱۸) ابراہیم علیہ السلام کی زیارت والدین کی اطاعت وفرمانبرداری ان کے ساتھ قول وفعل کے ذریعے اچھا سلوک کرنے، طالب علم کے لیے کوشش کرنے پر دلالت کرتی ہے، کبھی یہ نیک اور اچھے لوگوں کے ساتھ محبت اور ان سے جو دینی یا دنیاوی تو قعات رکھتا ہو ان کے پورا ہونے کی بھی علامت ہے۔