Khwab me emarat building dekhne ki tabeer
(۱) نئی عمارت دیکھناد نیاوی فائدہ ملنے کی نشانی ہے۔
(۲) کبھی عمارت کی تعبیر اپنی اہلیہ کے ساتھ شب باشی سے کی جاتی ہے۔ کوئی بھی تعمیر عورتوں کے معاملے پر دلالت کرتی ہے۔
(۳) کسی نے دیکھا کہ اس کے گھر یا اس کا کمرہ کی وسعت خوبصورت انداز سے ہوئی ہے تو یہ دنیاوی کشادگی اور خوشحالی کی علامت ہے۔
(۴) تعمیر اپنی مقدار سے متجاوز ہوتے ہوئے دیکھنا لوگوں کی اجازت کے بغیر کسی غمی یا خوشی کے موقع میں داخل ہونے کی طرف اشارہ ہے۔
(۵) کسی نے دیکھا کہ وہ مکان بنا رہا ہے تو تعبیر یہ ہے کہ وہ دوستوں کو یا رشتہ داروں یا اپنی فوج کو اکٹھا کر رہا ہے۔ صاحبِ خواب اگر بادشاہ ہے تو اس کی حکومت کی واپسی اور خوشی اور قوت اور معاملہ کی رفعت بقدرِ رفعت مکان و مضبوطی سے تعبیر کی جاسکتی ہے۔
(۶) کسی نے خواب دیکھا کہ اپنے مکان کو اکھیڑ رہا ہے تو یہ اس کے دوستوں یا رشتہ داروں اور قوم میں تفریق کی اور حکومت کے زائل ہو نے کی علامت ہے ۔
(۷) کسی نے دیکھا کہ وہ کسی عالم کے پرانے مکان کی تجدید (renovation) کر رہا ہے تو اس عالم کی سیرت کی اصلاح کرنے کی طرف اشارہ ہے۔
(۸) اگر کسی ظالم کے مکان کی تجدید کر رہا ہے تو اس کی سیرت کی اصلاح کی علامت ہے۔
(۹) کسی نے خواب دیکھا کہ اس نے مکان بنانے کے لیے بنیادیں کھودیں، ان کو بنایا اور مضبوط کیا تو اپنے مقصد میں کامیابی کی دلیل ہے؛ یعنی اگر طالب علم ہے تو وہ علم حاصل کرنے میں کامیاب ہو گا، حکومت کا طالب ہے تو اسے حکومت ملے گی، کوئی ہنر سیکھ رہا ہے تو اس میں کامیاب ہوگا۔
(۱۰) کسی نے کسی خاص علاقے میں خود کو مکان بناتے دیکھا تو تعبیر یہ ہے کہ صاحبِ خواب اس علاقے یا شہر میں شادی کرے گا۔
(۱۱) ٹھیکری سے مکان بنانا، تزئین و ریاء کی علامت ہے۔
(۱۲) خواب میں کیچڑ سے مکان بنانا حلال روزی پر دلالت کرتا ہے اور نقش و نگار والا مکان علم اور ولایت اور خوشی ملنے کی علامت ہے۔
(۱۳) کسی نے دیکھا کہ وہ پکی اینٹ سے اور چونے سے مکان بنا رہا ہے تو تعبیر یہ ہے کہ صاحبِ خواب باطل کام میں لگ جائے گا اس لیے چونا اور اینٹ کی تعبیر باطل امور سے کی جاتی ہے۔
(۱۴) خواب میں چونے اور اینٹ کا کاروبار حرام کام میں لگنے کی علامت ہے۔
(۱۵) کسی نے خواب میں دیکھا گویا کہ وہ اجنبی جگہ میں مکان بنا رہا ہے تو اس کی تعبیر یہ ہے کہ خواب دیکھنا والا ایسی عورت سے نکاح کرے گا جس کا تذکرہ پہلے کبھی نہیں ہوا ہے۔ کبھی یہی خواب اجنبی جگہ میں قیام پذیر ہونے اور وہیں انتقال کر جانے پر بھی دلالت کرتا ہے۔
(۱۶) مٹی کا مکان دین و یقین کی علامت ہے اور خشک مٹی رسوائی والا مال ہے۔
(۱۷) کسی نے دیکھا کہ وہ حضور اقدس ﷺ کے مزار مبارک کو مٹی لگا رہا ہے تو تعبیر یہ ہے کہ صاحبِ خواب اپنے مال سے حج کرے گا۔
(۱۸) اپنے مکان کو تر مٹی لگانا صالح ہونے کی علامت ہے۔
(۱۹) مٹی کھانا مال ملنے کی علامت ہے۔
(۲۰) خوبصورت عمارت کی تعبیر الفت و محبت، نسل ، رزق اچھے لباس، کنواری عورت اور اس کی اولاد سے کی جاتی ہے۔
(۲۱) مضبوط مکان صاحبِ خواب کی قوت و شدت پر دلالت کرتا ہے اور کبھی ایک دوسرے کے ساتھ مساعدت ومدد کی طرف اشارہ ہوتا ہے۔
(۲۲) بسا اوقات عمارت دیکھنا لمبی عمر کی علامت ہوتا ہے۔
(۲۳) کبھی عمارت کی دلالت عمارت بنانے والے پر ہوتی ہے۔
(۲۴) کسی نے دیکھا کہ وہ اللہ کی رضا کے لیے مسجد بنا رہا ہے تو تعبیر یہ ہے کہ اگر صاحبِ خواب بادشاہ ہے تو حق کو قائم کرے گا۔ اور امر بالمعروف و نہی عن المنکر کرے گا اور اگر خواب دیکھنے والا عالم ہے تو ایسی کتاب تصنیف کر دے گا جس سے لوگوں کو بہت نفع ہو گا۔ اگر صاحبِ خواب مالدار ہے تو اپنے مال کی زکوٰۃ ادا کرے گا اور اگر غیر شادی شدہ ہے تو اس کو شادی نصیب ہو جائے گی اگر شادی شدہ ہے تو اولاد کی دولت سے سرفراز ہوگا۔ اور اس کا ذکرِ خیر دنیا میں پھیل جائے گا اور اگر یہی خواب فقیر ومحتاج آدمی دیکھے تو وہ غنی ومالدار ہوگا یا مسجد کی خدمت کرے گا اور ذکر تلاوت اور اعمال صالح کے ذریعے مسجد کو آباد کرے گا یا کسی گناہ کا مرتکب ہے تو اس سے تو بہ کرے گا اور ہدایت یافتہ ہوگا اور اس خواب کی تعبیر شہادت کی موت سے بھی کی جاتی ہے اور کبھی یہ تعبیر مکان کے بنانے والے کے لیے چاہے خود صاحبِ خواب ہے یا کسی دوسرے کو بناتے دیکھتا ہے کسی اچھائی پر دلالت کرتی ہے مسجد بنانے کی مذکورہ تعبیرات اس وقت ہوں گی۔ جب صاحبِ خواب مسجد ایسی چیزوں سے بنائے جن سے عموما مسجد نہیں بنائی جاتی یا بغیر محراب کے یا خلافِ سمتِ قبلہ مسجد بنائی تو تعبیر خیر کے جگہ شرے کی جائے گی۔
(۲۵) خواب میں قبہ دیکھنا یا بنا نا رفعتِ شان یا بڑے لوگوں میں شامل ہونے کی طرف اشارہ ہے۔
(۲۶) کسی نے دیکھا کہ وہ خواب میں حوض کے کنارے درست کر رہا ہے تو تعبیر یہ ہے کہ وہ اپنے والد کا ادب و احترام کرے گا۔
(۲۷) کسی نے بادل پر قبہ بنایا تو یہ قوت حاصل کرنے کا اشارہ ہے۔
(۲۸) خواب دیکھا کہ آسمان میں اور زمین میں اس کے لیے قبہ نما مکان بنایا گیا تو دلیل ہے کہ اس کے اعمال درست ہوں گے اور شہادت کی موت نصیب ہوگی۔
(۲۹) خواب میں حمام بنانا کسی عورت سے زفاف کی طرف اشارہ ہے۔
(۳۰) مریض آدمی کا خواب میں اپنے منہدم گھر جس کے انہدام کا وقت معلوم نہ ہو دیکھنا مستقل صحت یابی کی علامت ہے۔
(۳۱) کسی نے دیکھا کہ اس کے باپ نے مکان بنایا اور صاحبِ خواب نے اس کو بلند کیا تو تعبیر یہ ہے کہ صاحبِ خواب اپنے والد کے مشن ( دنیا وی یا اخروی ) کو پورا کرے گا۔ اور اس کو مضبوط کرے گا۔
(۳۲) کسی نے خواب دیکھا کہ کام کرنے والے اس کے مکان کو بنا رہے ہیں۔ تو تعبیر یہ ہے کہ صاحبِ خواب کی اپنی بیوی سے لڑائی ہو گی یا اپنے کسی دوست سے جدائی ہوگی ۔ یا اس قسم کا اور کوئی واقعہ پیش ہوگا۔
(۳۳) معمار کی تعبیر ایسا شخص ہے جو حلال کے ذریعے لوگوں کو جمع کرتا ہے۔
(۳۴) عمارت کی تعبیر مندرجہ ذیل چیزیں ہوسکتی ہیں: شاعرہ ، عمر کا طویل ہونا ، دنیا کی طرف رغبت ، الفت ومحبت ، ایک دوسرے کی مدد کرنا۔
(۳۵) خواب میں پکی اینٹ، چونا اور ہر وہ چیز جس کے نیچے آگ جلائی جاتی ہے، ان میں کوئی خیر و بھلائی کی علامت نہیں۔
(۳۶) ناقص عمارت عہد شکنی کی علامت ہے۔