Khwab me paishab karne ki tabeer
(۱) خواب میں پیشاب کرنا مال خرچ کرنے کی علامت ہے، یا غیر مناسب چیز روندنے کی دلیل ہے۔
(۲) کثرت سے پیشاب آنا رزق میں کثرت کی دلیل ہے۔
(۳) پیشاب کا رک جانا یا مشکل کے ساتھ آنا کبھی خواب دیکھنے والے کے کاموں میں جلدی اور عدمِ استقامت کی دلیل ہے۔ وجہ اس کی یہ ہے کہ پیشاب روکنے والے کو جب تک پیشاب سے فراغت نہ ہو کبھی قرار نہیں ہوتا ہے۔ اور اس خواب کی تعبیر پانی پہنچانے کے وسائل (پانی کی نالیاں، پائپ وغیرہ) کی بندش بھی ہوتی ہے۔
(۴) کوئی شخص خواب میں کسی غیر معروف مقام میں پیشاب کرتا ہوا اپنے آپ کو دیکھے تو دلیل ہے کہ صاحبِ خواب اس علاقے میں شادی کرے گا اور اس کے ہاں اور بچہ پیدا ہو گا۔ بعض علماء نے کہا ہے کہ یہ خواب ایسے خرچ کرنے پر دلالت کرتا ہے جو واپس آجائے۔
(۵) خواب میں خود کو کنویں میں پیشاب کرتا ہوا دیکھنا مال خرچ کرنے کی دلیل ہے۔
(۶) خواب میں سامانِ تجارت پر پیشاب کرنا اس میں نقصان اٹھانے کی نشانی ہے۔
(۷) خواب میں محراب کے اندر پیشاب کرنا پیدائشِ ولد کی علامت ہے جو عالم فاضل ہوگا۔
(۸) اگر کسی نے دیکھا کہ وہ قرآن پر پیشاب کر رہا ہے تو یہ بیٹے کے حافظ ہونے کی علامت ہے۔
(۹) کسی نے دیکھا کہ کچھ پیشاب کرنے کے بعد پیشاب روک لیا۔ تو تعبیر یہ ہے کہ اگر صاحبِ خواب مالدار ہے تو اس کا بعض مال ضائع ہو گا۔ اور اگر تنگ دست ہے یا مصیبت زدہ ہے تو اس سے کچھ مصیبت ختم ہو جائے گی۔
(۱۰) کسی نے دیکھا کہ اس کے ساتھ دوسرا بھی کوئی پیشاب کر رہا ہے دونوں کے پیشاب آپس میں مختلط ہو گئے تو ان کے درمیان رشتہ داری قائم ہونے کی علامت ہے۔
(۱۱) کسی کا اپنے آپ کو پیشاب روکتے ہوئے دیکھنا اپنی بیوی پر غصہ کرنے کی علامت ہے اور اگر پیشاب آجائے اور پیشاب کی جگہ نہ ملے تو تعبیر یہ ہے کہ صاحبِ خواب اپنا مال دفن کرنا چاہتا ہے اور دفن کی جگہ نہیں مل رہی ہے۔
(۱۲) کسی نے دیکھا کہ مقامِ پیشاب میں بہت زیادہ پیشاب کیا؛ اگر صاحبِ خواب فقیر ہے تو اسے کشادگی ملے گی اور اگر مالدار ہے تو اس کو مالی نقصان ہوگا۔
(۱۳) کسی نے دیکھا کہ لوگ اس کے پیشاب کو اپنے ہاتھوں کے ساتھ مل رہے ہیں تو یہ دلیل ہے کہ اس کا لڑکا ہوگا اور لوگ اس کے تابعداری کریں گے۔
(۱۴) کوئی شخص ایک جان پہچان کے آدمی پر خود کو پیشاب کرتے دیکھے تو دلیل ہے کہ وہ اپنا مال خرچ کر کے اس کو رسوا کرے گا۔
(۱۵) کسی عورت کو کثرتِ بول کرتے دیکھنا دلیل ہے کہ وہ عورت مردوں کی خواہش رکھتی ہے۔
(۱۶) کوئی شخص اپنے پیشاب کے راستے سے دودھ نکلتا دیکھے تو یہ دلیل ہے کہ وہ فطرت کے خلاف عمل کر رہا ہے۔ اگر اس کو کوئی معروف آدمی پی لے تو دلیل ہے کہ وہ شخص اس پر حلال مال خرچ کرے گا۔
(۱۷) کسی نے دیکھا کہ اس کے پیشاب کے راستے سے خون نکلا ہے تو یہ دلیل ہے کہ وہ کسی طلاق یافتہ عورت سے یا ذی رحم مَحْرَم عورت (جس سے نکاح نہیں ہو سکتا) سے نکاح کرے گا جو اس کے علم میں نہ ہوگی۔
(۱۸) خواب میں پیشاب کی جگہ زعفران آنا مریض بیٹے کی دلیل ہے۔
(۱۹) کسی نے دیکھا کہ پیشاب کی جگہ شراب آئی تو دلیل ہے کہ اپنے مال میں اسراف کرے گا۔
(۲۰) کسی نے دیکھا کہ اس کے پیشاب کے راستے سے منی یا کیچڑ آیا تو دلیل ہے کہ وہ صحیح طریقے سے وضو نہیں کرتا اور نہ ہی اس کا اہتمام کرتا ہے۔
(۲۱) خواب میں براستہ پیشاب آگ آنا قوت والے بیٹے کی علامت ہے۔
(۲۲) کسی کے پیشاب کے راستے سے پاخانہ آ گیا تو نشانی ہے کہ وہ اپنے اہل (گھر والوں) کے ساتھ فحش حرکت کرے گا۔
(۲۳) اگر کسی کو پیشاب کی جگہ قے آجائے تو یہ ولد حرام (ناجائز اولاد) کی دلیل ہے۔
(۲۴) خواب میں پیشاب کے راستہ سے بلی نکلنا کسی ساحلی عورت کے بطن سے بیٹی پیدا ہونے کی دلیل ہے۔
(۲۵) اور پیشاب کے مقام سے پرندہ نکلنا پرندہ کی صحت کے بقدر صحتمند بیٹا پیدا ہونے کی علامت ہے۔
(۲۶) کھڑے ہو کر پیشاب کرنا مال مجہول (نامعلوم مال) خرچ کرنے کی دلیل ہے۔
(۲۷) کسی نے اپنی قمیص میں پیشاب کیا تو دلیل ہے کہ اس کے ہاں بیٹا پیدا ہو گا۔
(۲۸) اگر صاحبِ خواب غیر شادی شدہ ہے تو یہ خواب اس کی شادی کی دلیل ہے۔
(۲۹) کسی نے دیکھا کہ وہ اپنی ناک میں پیشاب کر رہا ہے تو دلیل ہے کہ وہ حرام میں مبتلا ہوگا۔
(۳۰) کسی نے بازار کی کسی محفل میں پیشاب کیا تو دلیل ہے کہ صاحبِ خواب اس بازار کا حقیقی محتسب ہوگا۔
حکایت : اردشیر بادشاہ کا والد ساسان ایک چرواہا تھا اس نے خواب دیکھا کہ گویا وہ پیشاب کر رہا ہے اور اس سے بخارات آسمان کی طرف بلند ہو رہے ہیں اور پورے آسمان میں پھیل رہے ہیں۔ اس نے بابک نامی ایک معروف معبِّر سے تعبیر پوچھی تو اس نے خواب بتانے کی یہ شرط لگائی کہ ساسان اپنے بیٹے کو اس کی طرف منسوب کرے گا ساسان نے یہ شرط منظور کی تو با بک نے کہا کہ تیرے ہاں بیٹا ہوگا اور پوری دنیا کا بادشاہ بنے گا چنانچہ ایسا ہی ہوا اور اردشیر بن با بک کے نام سے معروف ہوئے حالانکہ اردشیر کے والد کا نام ساسان تھا۔
(۳۱) کسی نے دیکھا کہ اس نے کسی قوم کے گھر، محلے میں، مسجد یا گاؤں کے اندر پیشاب کیا، تو دلیل ہے کہ یہ اپنا نطفہ اس میں چھوڑے گا؛ یعنی اس قوم میں شادی کرے گا۔ اسی طرح مسجد میں پیشاب کرنا ایک متقی فرمانبردار بیٹے کی علامت ہے۔
(۳۲) کسی نے دیکھا کہ گویاوہ کسی شیشے کے اندر، یا کسی برتن میں، یا کسی مشکیزے میں پیشاب کر رہا ہے تو دلیل ہے کے وہ کسی عورت کے ساتھ نکاح کرے گا ۔
(۳۳) کسی نے دیکھا گویا وہ دریا میں پیشاب کر رہا ہے تو دلیل ہے کہ اس کا مال عُشر یا زکوٰۃ کی صورت میں بادشاہ کے ہاں جائے گا۔
(۳۴) کسی نے دیکھا کہ گویا اس نے پیشاب کیڑے کی صورت میں کیا تو دلیل ہے اس کی اولاد پھیلے گی۔
(۳۵) کسی نے دیکھا کہ اس کے پیشاب کے راستے سے قلم نکلا تو دلیل ہے کہ اس کے ہاں بیٹا ہوگا جو تمام علوم کا حامل ہو گا اس لئے کہ قلم تمام علوم کے حصول کا ذریعہ ہے۔
(۳۶) بعض علماء معبرین نے کہا کہ کسی کے پیشاب کی بجائے سانپ نکلا تو علامت ہے اس کے بیٹا ہو گا جو اس کا دشمن بنے گا۔
(۳۷) کسی نے دیکھا کہ گویا اس نے خلافِ عادت بہت زیادہ پیشاب کیا، یا پیشاب سے ملوث ہوا، یا اس سے سخت بدبو آئی، یا وہ پیشاب کر رہا ہے اور لوگ اس کی طرف دیکھ رہے ہیں تو تعبیر یہ ہے کہ وہ مشکل میں پڑ جائے گا، یا اس کی شرارت ظاہر ہو گی جس سے اس کو شرمندگی ہو گی۔
(۳۸) خواب میں پیشاب پینا پیسے میں یا مال میں حرمت کے شبہ کی علامت ہے اور اسی طرح یہ خواب مصائب کی بھی نشانی ہے۔
خواب میں پیشاب کے قطرے دیکھنا
khwab mein paishab ke qatre dekhna
خواب میں پیشاب کے قطروں کی دلالت مقروض کے قرض کو بالاقساط ادا کرنے پر ہوتی ہے۔