Khwab me Jibreel AS ko dekhne ki tabeer
(۱) خواب میں حضرت جبریل علیہ السلام کو خوشی کی حالت میں بات چیت، وعظ ونصیحت یا وصیت کرتے ہوئے یا کسی قسم کی خوشخبری سناتے ہوئے دیکھنا شرف وعزت، قوت، کامیابی اور بشارت کی دلیل ہے۔
(۲) یہ خواب مظلوم کے لیے مدد، مریض کے لیے شفاء، خوف زدہ کے لیے امن، غمزدہ کے لیے غم سے نجات اور غیر حاجی کے لیے حج کی دلیل ہے۔
(۳) کبھی اس کی تعبیر شہادت کی موت نصیب ہونے سے بھی کی جاتی ہے اگر چہ طویل زندگی گزارے۔
(۴) خواب میں حضرت جبریل علیہ السلام سے کوئی چیز کھانا وغیرہ لینا اہلِ جنت میں سے ہونے کی دلیل ہے۔
(۵) اگر کافر خواب میں حضرت جبریل علیہ السلام کو دیکھے تو دلیل ہے کہ وہ شدت وخوف اور عقوبت میں مبتلا ہو گا۔
(۶) کسی نے خواب دیکھا کہ وہ حضرت جبرئیل اور حضرت میکائیل علیہما السلام کے درمیان معادلہ کر رہا ہے تو دلیل ہے کہ جبر میں یہودیوں کی موافقت کرے گا اور اللہ تعالی کے حکم کی خلاف ورزی اور عذاب کی علامت ہے۔
(۷) کسی نے دیکھا گویا حضرت جبریل علیہ السلام نے اس کو سلام کیا تو دلیل ہے کہ وہ بہت بڑا عالم بنے گا اور اس کا نام بلند ہوگا اور اہلِ علم کے ہاں عزت کی نگاہ سے دیکھا جائے گا۔
(۸) حضرت جبریل علیہ السلام کی زیارت بادشاہ کی طرف سے پیغام لانے والا پوشیدہ رازوں کے امین مرتبہ اور اولاد کی بشارت ہے۔
(۹) حضرت جبریل علیہ السلام کو دیکھنا بعض اوقات عبادت گذاری اور اصحابِ باطن کے لیے علم الاسرار کی تعلیم پر بھی دلالت کرتا ہے۔
(۱۰) کبھی یہ خواب دیکھنا قریب المرگ لوگوں کے لیے روح کی علامت ہوتی ہے۔
(۱۱) بسا اوقات زیارتِ حضرت جبریل علیہ السلام نقل وحرکت کرنے اور دشمنوں کے مقابلے میں کسی کی مدد کرنے کی علامت ہوتی ہے۔
(۱۲) اور کبھی ان کی رؤیت علم الشریعت اور علمِ نجوم پر مطلع ہونے کی بھی دلیل ہوتی ہے۔
(۱۳) خواب میں حضرت جبریل علیہ السلام کو مغموم حالت میں دیکھنا شدت وعقوبت میں مبتلا ہونے کی دلیل ہے۔
(۱۴) کسی نے خواب دیکھا کہ اس کی صورت حضرت جبریل علیہ السلام کی صورت بن گئی تو دلیل ہے کہ صاحبِ خواب کثیر البرکت اور سخی ہو گا۔